10 Junie 2002 was Henru nie lekker nie.
Toe ek by die huis kom, was Roselinah se
terugvoering dat hy baie slaperig is en ook naar word.
Dr. Zorio het weer bloedtoetse aangevra en is ons
na Dr. Le Roux waar sy bloed getrek het. (Hou in gedagte dat Henru nie maklik
bereikbare are het op sy hande of waar mens normaalweg bloed trek in die buig
van die arm nie. Elke keer moet ek sy kop vashou en iets doen wat hom of laat
huil of gesels of iets sodat die are in sy nek kan uitstaan en dan trek hulle
bloed uit sy nekare.)
11 Junie 2002 kry ons die bloeduitslae en beveel Dr
le Roux aan dat ons Johannesburg toe gaan en 19:20 word Henru opgeneem in
Milpark. Die Epanutin veroorsaak toksiese vlakke in die bloed en dit het te
hoog gestyg en moes hy 'n drup kry om dit te stabiliseer. Die 12de was hy weer beter en die
13de is ons weer huis toe.
Ongelukkig het Suzaan Botes geëmigreer na Kanada en
moes ons 'n nuwe terapeut kry. Die "gewone" fisioterapeute wou nie
met Henru werk nie en het verduidelik dat dit gaan oor die korrekte
posisionering en strekke wat met serebraal gestremde persone gedoen word en dit
is waar die "Neuro ontwikkelings terapeute" voor gekwalifiseerd is.
Suzaan het toe aan ons die die voorstelle gemaak
van een in Pretoria en een in Klerksdorp. Ons het op Klerksdorp besluit
aangesien Ouma Hannetjie se suster in Klerksdorp bly en so het ons by Christa
Kritzinger uitgekom.
Ons het een keer per maand op 'n Saterdag na haar
gegaan waar sy dan vir ongeveer tot drie ure met Henru gewerk het en vir ons
gewys het wat om te doen. Ons het dit op video geneem sodat ek kon sien wat om
te doen, dan het ons huis toe gegaan en die oefeninge gedoen vir die maand. Die
volgende keer wys sy vir ons ander oefeninge en so kry ek en Roselinah dan
opleiding en word een keer per maand geëvalueer om te sien of ons dit korrek
doen.
No comments:
Post a Comment